मालवण : सिंधुदुर्ग जिल्ह्यात तारकर्ली, देवबागपाठोपाठ आता वेंगुर्ले आणि देवगडमधील दहा गावांमध्येही स्कूबा डायव्हिंग सुरू करण्यात येणार आहे. त्यासाठी १६४ जणांना तारकर्ली येथे प्रशिक्षण दिले जाणार आहे. आंतरराष्ट्रीय सागर संशोधक डॉ. सारंग कुलकर्णी यांनी नुकतीच मालवणमध्ये पत्रकार परिषदेत ही माहिती दिली.
संयुक्त राष्ट्र विकास कार्यक्रम (यूएनडीपी) आणि तारकर्ली येथील इंडियन इन्स्टिट्यूट ऑफ स्कूबा डायव्हिंग अँड अॅक्वेटिक स्पोर्ट (इस्दा) ही संस्था यांच्यातर्फे राबवण्यात येणाऱ्या अतिरिक्त पर्यटनस्थळ विकास या प्रकल्पांतर्गत हा कार्यक्रम राबवला जात आहे. तारकर्ली, देवबाग येथे बहरात आलेले जलपर्यटन देवगड आणि वेंगुर्ले तालुक्यातही बहरण्यास या उपक्रमामुळे मदत होणार आहे. स्कूबा डायव्हिंग आणि जलक्रीडा या माध्यमातून ५०० जणांना थेट रोजगार उपलब्ध झाला आहे. तसेच, चार हजार जणांना अप्रत्यक्षरीत्या रोजगार उपलब्ध झाला असून, आर्थिक उलाढाल शंभर कोटी रुपयांवर पोहोचली आहे.
देवगड आणि वेंगुर्ले तालुक्यात पर्यटन अद्याप फारसे वाढलेले नाही. त्यामुळे पर्यटनवाढीसाठीचा पहिला टप्पा म्हणून स्कूबा डायव्हिंगचे प्रशिक्षण मोफत देण्यात येणार आहे. या प्रशिक्षणाचा खर्च ‘यूएनडीपी’च्या माध्यमातून केला जाणार आहे, तर प्रशिक्षण ‘इस्दा’तर्फे दिले जाणार आहे. स्कूबा डायव्हिंगच्या प्रशिक्षणासाठी देवगड आणि वेंगुर्ले तालुक्यातील विजयदुर्ग, रामेश्वर, गिर्ये, मीठमुंबरी, भोगवे, खवणे, वेंगुर्ले, शिरोडा, रेडी या दहा ठिकाणी चांगली ठिकाणे असल्याचे सर्वेक्षणात दिसून आल आहे. त्यामुळे मालवणप्रमाणेच भविष्यात या ठिकाणांवरही सागरी पर्यटनाला मोठी चालना मिळणार आहे. या माध्यमातून येथील युवकांच्या हाताला काम मिळणार आहे.
पहिल्या टप्प्यात प्रशिक्षण मोफत
या प्रशिक्षणासाठी २२ हजार रुपये खर्च येतो; मात्र पहिल्या टप्प्यात हे प्रशिक्षण मोफत दिले जाणार आहे. यासाठीचे अर्ज संबंधित ग्रामपंचायतींमध्ये उपलब्ध केले जाणार आहेत. त्यातून सात एप्रिल रोजी १६४ प्रशिक्षणार्थींची निवड होईल. नऊ एप्रिलपासून तारकर्ली स्कूबा डायव्हिंग सेंटमध्ये प्रशिक्षण कार्यक्रम सुरू केला जाणार आहे. वेंगुर्ले आणि देवगड तालुक्यातील रहिवासी असलेल्यांनाच हे प्रशिक्षण दिले जाणार आहे. तसेच, महिलांना प्राधान्य देण्यात येणार आहे.
चार प्रकारचे प्रशिक्षण
या कार्यक्रमांतर्गत स्कूबा डायव्हिंगसाठी पाच दिवस, आतिथ्य व्यवस्थापनासाठी पाच दिवस, बोट चालवण्यासाठी चार दिवस आणि सागरी विश्वाची ओळख करून देण्यासाठी पाच दिवस प्रशिक्षण दिले जाणार आहे.